Zuberoaren garapena eta Euskal Herriko lurralde ezberdinen arteko hartu-emana sustatzeko bide sakonak garatzen ari dira. Abeltzaintza eta laborantza sektoreak horien lekuko argia dira. Baina sektore horietatik harago, kultur mailan ere bide berriak eraikitzen hasiak gara. Nazio Eztabaida Guneak eginiko zubi lanaren ondotik, Atharratzeko ikastolarekin auzolan berria garatu da.

Martxoaren 14an, Lezo eta Oiartzungo udalak eta Atharratzeko ikastolak hitzarmen bat sinatu zuten. Bertan, bi udalek 18.000€ko diru ekarpena egiteko konpromisoa hartu zuten eta Atharratzeko ikastolako guraso eta irakasleek aldiz, jaialdi bat egitekoa.

Atharratzeko Basabe ikastola, Seaskaren barne Zuberoan dauden bi ikastoletako bat da eta 30 urte bete berri ditu. 10 ikasle izatetik 21 izatera igaro dira eta berri pozgarria izanik ere, zailtasun eta arazoak sortu dizkie, baliabide pertsonal nahiz material faltagatik. Egoera horri aurre egiteko erabiliko dute udaletatik jasotako laguntza ekonomikoa.

Ez da ordea diru ekarpen huts batean oinarritutako hitzarmena. Zuberoaren inguruko ezagupena eta harremana sustatzea du helburu eta hori indartzeko asmoz egun osoko jaialdia antolatu dute Ekainaren 21erako Lezo eta Oiartzunen.

Hurbil zaitez!