Gaurkoan Nafarroan Oinez osaptzen da Sakanan, Arbizu eta Arruazu artean. Bi herri hauek eta Lakuntza batuko dituen ibilbidean ez da bakarrik Etxarri-Aranazko ikastolaren aldeko diru-bilketa bat eginen, ez eta euskararen aldeko pausoak eman. Askoz gehiago da aldarrikatuko dena: euskaldunok, geure txikitasunean ere, handi egin ditzakegula hainbat proiektu. Hezkuntza Sistema Nazionalaren aldarria herri honen gehiengoak defendatzen duela uste dugu, eta hala ikusi ohi da Nafarroa Oinez bezalako jaietan. Geure hezkuntza antolatu, geure herria ikasi edo euskara sustatzeko gogoarekin joan ohi dira milaka eta milaka herritar jaiotara.

Euskal Herriak Bere Eskolako kideok gaur indar bereziz Nafarroa Oinezen parte hartzeko deia luzatu nahi dugu, oraindik ere norbaitek dudak izango balitu. Eta horrelako jaietan Hezkuntza Sistema Nazionala eraikitzeko konpromisoa berrestea. Nafarroan momentu honetan kolokan dagoen D ereduko hezkuntza bultzatu behar dugu, TIL ereduaren aurrean; Euskal Herria terminoa ukatu nahi digun Gobernuari aurre egin behar diogu, geure Curriculuma garatuz; eta herriak bizirike egoteko eskolak beharrezkoak direla aldarrikatu. Ikastola batek, txikia bada ere, handi egiten duelako herria.

Gaur denok Sakanara!